குருநானக்

இடைக்காலத்தில் வாழ்ந்த மற்றொரு சமயத்தலைவர் குருநானக். அவர் சீக்கிய சமயத்தை நிறுவினார். தொடக்கத்தில் கபீரின் சீடராகவும் விளங்கினார். லாகூருக்கு அருகிலுள்ள தால்வாண்டி என்ற இடத்தில் குருநானக் பிறந்தார். ஜாதி வேற்றுமைகளைச் சாடிய அவர், புனித நதிகளில் நீராடுவது போன்ற சடங்குகளை இகழ்ந்தார். அவரது சமயக் கருத்துக்கள் ஒழுக்கத்தை வலியுறுத்துவதாகவும் அதே சமயம் நடைமுறைக்கு உகந்ததாகவும் இருந்தன.

சுயநலம், பொய்மை, போலி வேடம் போன்ற வற்றை விட்டொழிக்குமாறு அவர் மக்களை கேட்டுக் கொண்டார். உண்மை, நேர்மை, அன்பு ஆகியவற்றைக் கொண்டு வாழ்க்கையை கடைப்பிடிக்குமாறு வலியுறுத்தினார். 'அசுத்தங்கள் நிறைந்த இவ்வுலகில் சுத்தமாக இருங்கள்' என்பது அவரது புகழ்மிக்க வாசகங்களில் ஒன்றாகும். இந்து, முஸ்லிம் ஒற்றுமைக்காகவே அவர் தனது வாழ்நாளை அர்ப்பணித்தார். அவரது சீடர்கள் சீக்கியர்கள் என்று அழைக்கப்பட்டனர்.

வங்காளத்தில் கிருஷ்ண பக்தியைப் பரப்பிய சைதன்யர் மற்றொரு பக்தி நெறி பரப்பிய சீர்திருத்தவாதி. துறவறம் பூண்ட அவர் நாடெங்கும் சுற்றி தமது கருத்துக்களைப் பரப்பினர். மனித சகோதரத்துவத்தை அவர் எடுத்துரைத்தார். சமயம், சாதி அடிப்படையிலான வேறுபாடுகளை அவர் சாடினார். அன்பையும் அமைதியையும் வலியுறுத்திய சைதன்யர், துன்பப்படும் மக்களிடம் பரிவு காட்டினார். குறிப்பாக ஏழைகளிடமும் வலிமை குன்றியோரிடமும் கருணை காட்டினார். அன்பு, பக்தி, ஆடல், பாடல் மூலம் கடவுளைக் காணலாம் என அவர் நம்பினார். அனைத்து வகுப்பினரையும் தமது சீடர்களாக்கிக் கொண்டார். இன்றும்கூட வங்காளத்தில் சைதன்யரின் போதனைகளை மக்கள் பின்பற்றி வருகின்றனர்.