இந்தியாவில் அலெக்சாண்டரின் படையெடுப்பு (கி.மு. 327 - கி.மு. 325)

அலெக்சாண்டர் படையெடுப்பின்போது அரசியல் நிலை

பாரசீகர்கள் படையெடுத்து இரண்டு நூற்றாண்டுகளுக்குப் பிறகு மாசிடோனியாவைச் சேர்ந்த அலெக்சாண்டர் இந்தியானின்மீது படையெடுத்தார். அவரது படையெடுப்பின்போது வடமேற்கு இந்தியாவில் பல சிறு அரசுகள் இருந்தன. தட்சசீலத்து அம்பி, அபிசார நாட்டு அரசன், ஜீலம், சீனாப் நதிகளுக்கு இடைப்பட்ட பகுதியை ஆட்சி செய்த போரஸ் போன்ற முதன்மையான அரசர்கள் இப்பகுதியில் ஆட்சி புரிந்தனர். நிசா போன்ற பல குடியரசு நாடுகளும் இருந்தன. இந்தியாவின் அரசியல் ஒற்றுமை குறைந்த பகுதியாக வடமேற்கு இந்தியா விளங்கியதோடு, ஆட்சியாளர்களும் தங்களுக்கிடையே போரிட்டுக் கொண்டிருந்தனர். பொது எதிரியை வீழ்த்துவதற்குக்கூட அவர்கள் ஒன்று சேரவில்லை. இருப்பினும், பல்முனை எதிர்ப்புகளை வெற்றிகொள்வது என்பது அலெக்சாண்டருக்கு எளிதாக இருந்தது என்று கூறமுடியாது.

படையெடுப்புக்கான காரணங்கள்

கி.மு. 334 ஆம் ஆண்டு தனது தந்தை பிளிப் மறைந்தபிறகு, அலெக்சாண்டர் மாசிடோனியாவின் அரசராகப் பதவியேற்றார். கி.மு, 330 ஆம் ஆண்டு அர்பேலா போரில் மூன்றாம் டேரியசை முறியடித்து பாரசீகம் முழுவதையும் கைப்பற்றினார். மேலும் கிழக்கு நோக்கி படையெடுத்து இந்தியாவிற்குள் நுழைந்து இந்திய மாகாணத்தைக் கைப்பற்றுவது அவரது நோக்கம். ஹெரோடோடஸ் போன்ற எழுத்தாளர்கள் குறிப்பிட்டிருந்த இந்தியாவின் செல்வச் செழிப்பு அலெக்சாண்டரின் கவனத்தை ஈர்த்தது, புவியியல் ஆய்வு மேற்கொள்ளும் ஆர்வம் மற்றும் இயற்கையை ஆய்வு செய்தல் போன்ற காரணங்களாலும் அலெக்சாண்டர் இந்தியா மீது படையெடுத்தார். இந்தியாவிற்கு கிழக்கே தொடர்ந்து கடல் இருப்பதாகவும் அவர் நம்பினார். அது அக்காலத்திய புவியியல் கருத்தாக இருந்தது. எனவே இந்தியாவை கைப்பற்றுவதன்மூலம் உலகத்தின் கிழக்கு எல்லையை கைப்பற்றிவிடலாம் என்றும் அவர் கனவு கண்டார்.



ஹைடாஸ்பஸ் போர்

கி.மு. 327 ஆம் ஆண்டு அலெக்சாண்டர் இந்துகுஷ் மலைகளைக் கடந்து, கிட்டத்தட்ட எட்டுமாத காலம் அங்கிருந்த பழங்குடிகளிடம் போரிட்டார். கி.மு. 326ல் அவர் படகுப்பாலம் அமைத்து சிந்து நதியைக் கடந்தார். தட்சசீலத்து அம்பி அவரை அன்புடன் வரவேற்றார். அங்கிருந்துகொண்டே, போரஸ் மன்னரை சரணடையுமாறு கோரினார். ஆனால், போரஸ் அதற்கு உடன்படாமல் போரிடுவதற்கு தயாரானார். பின்னர், அலெக்சாண்டர் தட்சசீலத்திலிருந்து புறப்பட்டு ஹைடாஸ்பஸ் (ஜீலம்) நதிக்கரையை அடைந்தார். நதிக்கு அப்பால் போரசின் பெரும்படை அணிவகுத்திருப்பதைக் கண்டார். ஜீலம் நதியில் வெள்ளம் பெருக்கெடுத்து ஓடிக்கொண்டிருந்தது. அதனைக் கடப்பது எளிதாக இருக்கவில்லை. சிறிது நாட்கள் காத்திருந்த பின்னர் அவர் ஜிலம் நதியைக் கடந்து காரிச்சமவெளியில் போரசின் படைகளோடு போரிட்டார். இதுவே புகழ்மிக்க ஹைடாஸ்பஸ் போர் எனப்படுகிறது. மிகவும் கடுமையான போராகவே அது காணப்பட்டது. வலிமையான படைகள் இருந்தபோதிலும் இறுதியில் போரஸ் தோற்றுப் போனார். இந்திய அரசனின் வீரத்தையும் தலைமைப் பண்பையும் கண்டு வியப்பெய்திய அலெக்சாண்டர் போரசை பெருந்தன்மையுடன் நடத்தியதோடு மீண்டும் அரியணையில் அமர்த்தினார்.